Kushtet e Përdorimit

1. Kurset

Regjistrimi dhe pagesa. Pas përfundimit të regjistrimit dhe kryerjes së pagesës, tarifa e kursit nuk rimbursohet në rast anulimi nga pjesëmarrësi, edhe nëse mësimi nuk ka filluar ende, përveç rasteve kur rimbursimi kërkohet nga legjislacioni në fuqi.

Alternativat e ofruara. Nëse pjesëmarrësi has vështirësi për të vazhduar kursin ose ka pakënaqësi lidhur me organizimin e tij, Anglia Academy shqyrton mundësinë e:

• Ndërrimit të mësueses ose mësuesit.
• Ndryshimit të orarit ose kalimit në një grup tjetër të nivelit përkatës.
• Kalimit nga mësimi fizik në mësim online, ose anasjelltas.
• Shtyrjes së fillimit ose pezullimit të përkohshëm të kursit, në raste të arsyetuara.

Këto alternativa varen nga disponueshmëria, formati i kursit dhe marrëveshja me shkrim me administratën. Nëse alternativa e zgjedhur ka tarifë më të lartë, diferenca komunikohet paraprakisht dhe zbatohet vetëm pas pranimit nga pjesëmarrësi.

Mungesat dhe ndërprerja. Mungesat, mosvijimi i mësimit ose ndërprerja për arsye personale, shëndetësore, udhëtimi apo angazhimesh të tjera nuk krijojnë të drejtë automatike për rimbursim, ulje tarife ose zgjatje të kursit. Zëvendësimi i orëve bëhet vetëm sipas rregullave të paketës së regjistruar dhe marrëveshjes me administratën. Njoftimi i mësuesit për mungesë nuk përbën miratim për pezullimin ose transferimin e kursit.

Ndryshimi i mësuesit. Anglia Academy mund të caktojë një mësues tjetër të përshtatshëm kur kjo kërkohet për vazhdimësinë e mësimit. Ndryshimi i mësuesit, në vetvete, nuk përbën arsye për rimbursim, nëse shërbimi vazhdon sipas kushteve të dakorduara.

2. Testet ndërkombëtare

Regjistrimi për sesionin e caktuar. Pas përfundimit të regjistrimit dhe pagesës për një test ndërkombëtar në një sesion të caktuar, tarifa nuk rimbursohet në rast anulimi nga kandidati. Pagesa lidhet me kandidatin, llojin dhe nivelin e testit, si dhe datën ose sesionin e konfirmuar.

Moskalimi i testit. Nëse kandidati nuk e kalon testin ose nuk arrin rezultatin e synuar, tarifa e paguar konsiderohet e shfrytëzuar. Ajo nuk rimbursohet dhe nuk bartet në një test tjetër. Për ritestim kërkohet regjistrim dhe pagesë e re, përveç rasteve kur është konfirmuar paraprakisht një ofertë që përfshin ritestimin.

Mospjesëmarrja. Nëse kandidati nuk paraqitet në test për arsye personale, angazhime pune, udhëtimi ose arsye të tjera, pagesa nuk rimbursohet dhe nuk bartet automatikisht në një sesion tjetër.

Vonesa dhe mosplotësimi i kërkesave. I njëjti rregull zbatohet kur kandidati nuk lejohet të marrë pjesë për shkak të vonesës, mungesës së dokumentit të vlefshëm të identifikimit, mospërputhjes së të dhënave ose mosplotësimit të kërkesave të komunikuara paraprakisht. Për testet online, kandidati duhet të plotësojë kërkesat teknike dhe të ambientit të përcaktuara nga institucioni certifikues.

Raste të jashtëzakonshme emergjente. Në raste të rënda dhe të dokumentuara, si shtrim urgjent në spital ose vdekje në familjen e ngushtë, Anglia Academy mund t’i paraqesë institucionit certifikues ose organit përkatës një kërkesë të veçantë për ricaktimin e testit. Kandidati duhet të njoftojë administratën pa vonesë dhe të dorëzojë dokumentacionin mbështetës brenda afateve të kërkuara. Paraqitja e kërkesës nuk garanton miratim. Vendimi, data e re dhe çdo tarifë shtesë varen nga rregullat e institucionit përkatës. Deri në konfirmimin me shkrim, sesioni fillestar mbetet në fuqi.

Transferimi dhe shkelja e rregullave. Kalimi i pagesës te një kandidat tjetër, ndryshimi i nivelit ose ndryshimi i sesionit lejohet vetëm kur institucioni certifikues e mundëson dhe e miraton. Përjashtimi për shkelje të rregullave të testimit nuk krijon të drejtë për rimbursim.

3. Anglia Summer School — kampi veror

Anulimi para fillimit. Rimbursimi i plotë i shumës së paguar bëhet kur kërkesa me shkrim pranohet të paktën 48 orë para fillimit të javës ose edicionit të rezervuar, me kusht që fëmija të mos ketë marrë pjesë në të.

Anulimi pas këtij afati. Kur kërkesa bëhet më pak se 48 orë para fillimit ose pasi java apo edicioni ka filluar, pagesa nuk rimbursohet.

Ditët e munguara. Ditët e munguara gjatë një pakete javore nuk rimbursohen dhe nuk barten automatikisht në javë të tjera, përfshirë mungesat për arsye shëndetësore, udhëtime ose angazhime familjare të paparashikuara.

Regjistrimi ditor. Familjet që kanë nevojë për fleksibilitet mund të zgjedhin regjistrimin ditë për ditë, kur ky opsion ofrohet dhe ka vende të lira. Tarifa ditore dhe kushtet konfirmohen para rezervimit.

Transporti dhe shërbimet shtesë. Transporti dhe shtesat e rezervuara ndjekin të njëjtat afate anulimi dhe rimbursimi si java ose edicioni të cilit i përkasin.

4. Si paraqiten kërkesat

Kërkesat për anulim, ndryshim, shtyrje ose rimbursim paraqiten me shkrim në info@angliaacademy.com, mundësisht nga adresa e përdorur gjatë regjistrimit.

Kërkesa duhet të përmbajë:

• Emrin dhe mbiemrin e pjesëmarrësit ose kandidatit.
• Emrin e kursit, testit ose programit dhe datën përkatëse.
• Numrin e faturës ose dëshminë e pagesës.
• Arsyen e kërkesës dhe dokumentacionin mbështetës, kur kërkohet.

Për llogaritjen e afateve merret parasysh koha e pranimit të emailit. Çdo përjashtim ose ndryshim është i vlefshëm vetëm pas konfirmimit me shkrim nga Anglia Academy.

5. Pagesat online dhe kthimi i shumave të miratuara

Rimbursimet e miratuara për pagesat me kartelë kthehen në të njëjtën kartelë me të cilën është kryer pagesa. Përpunimi zakonisht zgjat 5–10 ditë pune nga konfirmimi i rimbursimit, në varësi të bankës dhe ofruesit të pagesave.

Për pagesat me transfertë bankare ose para të gatshme, mënyra e kthimit dakordohet me paguesin dhe dokumentohet. Çdo zbritje e mundshme për komisione ose kosto të pakthyeshme duhet të jetë komunikuar paraprakisht dhe të lejohet nga ligji. Në rast anulimi nga Anglia Academy, zbatohet pika 6.

6. Anulimi ose ndryshimet nga Anglia Academy

Nëse Anglia Academy anulon një kurs, program ose edicion para fillimit, pjesëmarrësit i ofrohet rimbursim i plotë ose kalim në një datë tjetër, sipas zgjedhjes së tij.

Nëse shërbimi ndërpritet pasi ka filluar dhe nuk mund të përfundohet, ofrohet një alternativë e përshtatshme ose rimbursim për pjesën e paofruar.

Për ndryshime thelbësore në shërbimin e dakorduar, pjesëmarrësi njoftohet dhe i ofrohet një zgjidhje e përshtatshme. Nëse një test ndërkombëtar anulohet ose shtyhet nga institucioni certifikues, Anglia Academy njofton kandidatët dhe administron ricaktimin ose rimbursimin sipas rregullave përkatëse dhe legjislacionit në fuqi.

7. Të drejtat ligjore

Këto kushte nuk kufizojnë të drejtat e detyrueshme të konsumatorit sipas legjislacionit në fuqi, përfshirë çdo të drejtë të zbatueshme për tërheqje nga kontratat në distancë ose për rimbursim kur shërbimi nuk ofrohet sipas marrëveshjes.